Bawng tihlumte chu khaihlum an ni ang : Chhattisgarh CM

Chhattisgarh Chief Minister Raman Singh chuan bawng tihlumte chu khaihlum an nih tur thu a sawi.

Gujarat state chuan ramchhunga bawng humhalhna dan khauh ber siamin, he dan hnuaiah hian bawng talhtute chu damchhung tantir theih an ni tawh dawn a ni. Hei bakah bawng tawlhna atana hman motor-te pawh pekkir tawh lo tura mansak theih an ni bawk.

Gujarat-in bawng humhalhna dan thar a siam hnuah Chhattisgarh CM hi a rawn ṭawngchhuak ve leh a, an state-ah bawng humhalhna dan khauh zawk siam a ni ve dawn em tia zawhna chu chhangin, bawng talhtute chu khaihlum an nih tur thu hi a sawi a ni. Kum 15 kalta chhungin an state-ah bawng talh an awm loh thu a sawi.

Chhattisgarh-ah hian bang, lawi leh sial talh leh an sa zawrh khap a ni a, state danga talh tura phurh­chhuah pawh khap a ni bawk. He dan bawhchhiate chu kum sarih lung-in tantir leh, Rs 50,000 thleng chawitir theih an ni. Chhattigarh-ah hian sa talhna in awm mah se, heng hmunah hian kel chauh talh phal a ni.

BJP sorkar state-ah bawng humhalhtu intiten bawng talhtute leh tawlhrutu nia puhte kut an thlak fo a, hemi chungchangah hian central leh state-a BJP sorkar chu bawng humhalhtu pawlte pawikhawihna dan leh thununna kawngah hma la duh lohah eptute chuan an puh a ni. BJP chu India rama Hindu sakhaw chawisan tumah puhin, Hindu sakhaw serh leh sangte chu kenkawh tumah an puh a ni. Nikum khan Jharkhand-ah bawng tawlh ru ṭhin nia puh mi pahnih chu thah an ni a, an ruang hi thingah an khai a ni.