Kum 3-4 danah banknote security mark thlak ṭhin tum
Sorkar laipui chuan pawisa note lem darh zel venna tur kawng khat atan Rs 2,000 leh Rs 500 note-a security feature-te chu kum 3-4 danah thlak ṭhin a tum.
Nikum November thlaa sorkar laipuiin pawisa note lian pahnih, Rs 1,000 leh Rs 500 note a tih thih hnuah Rs 2,000 leh Rs 500 note thar a tichhuak a, mahse pawisa note thar tihchhuahte hi a lem a darh leh tawh a, tunhnaiah pawh pawisa lem hi man a ni fo a ni.
Ningani khan Finance leh Home ministry senior official-te chuan high-level meeting hi neiin, pawisa lem darh chungchang hi an sawiho a, he meeting-ah hian Union Home Secretary Rajiv Mehrishi pawh a tel.
Home Ministry official-te chuan ram changkang zawkahte an pawisa-a security feature chu kum 3-4 danah an thlak ṭhin tih an sawi a, hei hi India pawhin a zawm ve a ngai dawn niin an sawi.
India pawisa note sanga design hi hun rei tak thlak lohin an awm a, nikuma pawisa tihthih a nih hma khan kum 2000-a Rs 1,000 note tihchhuah chu tihdanglam lohin dah a ni. Kum 1987-a Rs 500 note hlui tihchhuah pawh kum sawm hnuah chauh siam danglam a ni bawk. Official-te chuan tuna note thar tihchhuah pawh hi Rs 1,000 leh Rs 500 note hlui nen khan security feature lamah danglamna leh dahbelh a awm hran lo niin an sawi.