BJP-in senior advocate lakah complaint thehlut

BJP chuan senior advocate leh Swaraj Abhiyan party hruaitu, Prashant Bhushan chu Lord Krishna chungchang hmusit taka sawiah puhin a lakah complaint an thehlut.

Prashant Bhushan hian Pathianni zing khan a twitter-ah Uttar Pradesh Chief Minister thar Yogi Adityanath-a’n ‘anti-Romeo squad’ a din chungchang a tarlang a, “Romeo chuan hmeichhe pakhat chauh a hmangaih a, mahse Krishna chu hmeichhe tam tak chhaihtu a ni. Anih chuan Adiyanath hian amah thlawptute hi ‘Anti-Krishna squad’ tiin a ko ngam dawn em?” tiin a ziak a ni.

He thu a ziah vang hian Bhushan hi nasa taka sawisel a ni a, Lord Krishna chungchang a ziah dan chu Hindu ho a beihna niin an puh a, BJP chuan Hindu sakhaw zuitute rilru tina turin a tum luih reng vanga ziak niin an puh a, BJP thupuangtu P S Bagga chuan police-ah complaint a thehlut a ni.

Bhushan chuan a thuziah chung­chang hi sawifiahin, midang rilru tih­nat a tum lo a, UP sor­kar thiltih chung­chang a sawi­selna mai niin a sawi.

UP CM chuan Anti-Romeo squad a din chhan chu hmeichiate himna atan leh, chhaih leh zui an tawh ṭhin venna tura din a nih thu a sawi. Hetih lai hian sawiseltu tam tak chuan squad-te hian inngaizawng awmdun te pawh an man tel zel niin an sawi.

Prashant Bhushant-a’n anti-Romeo squad a sawisel vang hian nimin khan mi 7-8 vel chu a chenna in, sector 14, Noida-ah chawhnu lam khan kalin ngaihdam dil turin an phut a, Bhushan-a in hi pentuiin an theh bawk. Heng mite kal lai hian Bhushan hi a inah a awm lo a, a awmpuite chuan police-te an hriattir nghal a ni. Hemi hnu hian BJP Youth Morcha (BJYM) member-te chuan a in kawtah hian Hindu-te rilru a ti na nia sawiin, Bhushan chu thupha chawi turin an phut ve leh bawk.