Srinagar-a grenade puakah Police pakhat thi, mi 14 hliam

Jammu and Kashmir khawpui Srinagar-a, Ganjbaksh Park-a police-te awmnaah Pathianni zan khan helhoin grenade an tipuak a, police pakhat a thi a, midang 14-in hliam an tuar.

Grenade tihpuaha police thi hi Shamin Ahmad a ni a, hliam tuar zinga a tam ber hi police an ni a, CRPR mi pali an hliam tel bawk. Hliam tuarte hi damdawi-in lam panpui nghal an ni.

Police official-te chuan Pathianni zan dar 7 vel khan Nowhatta area-a, Ganjbaksha Park-a police duty zo chawl hahdamte chu helho hian grenade hmang hian an bei niin a sawi. Hemi hma hian Nowhatta-a police-te chu lungin an lo tawng tawh bawk. Pathianni vek khan Srinagar-a Bemina area-ah helhoin army convoy an bei a, sipai pathumin hliam an tuar a ni.

Nimin khan sipai pakhat chu a bag-ah grenade pahnih a lo kawl avangin Srinagar airport-ah man a ni. Sipai an man hi 17 JAK Rifles a mi, jawan Gopal Mukhiya a ni a, Uri sector-a Line of Control bula duty a ni.

Police-te chuan Mu­khiya hi Delhi pan tur thlawh­theihnaa a chuan dawna a bungrua an en­dik­naah grenade hi an hmuh thu an sawi a, sipai hian grenade hi sangha manna atana hman tur a nih thu leh, officer pakhatin a pek niin a sawi.