Bihar-ah Agnipath scheme duh lohna lantir

Sorkar laipuiin short-term contractual basis-a sipai lak dan tur a siam, Agnipath scheme chu duh loin nimin khan Bihar-a hmun hrang hrangah ṭhalaiten lungawi lohna an lantir.

Agnipath scheme hnuaia army, navy leh air force-a sipaia lakte hi kum li chhung atan niin, kum li zawh hnuah pension leh hamṭhatna dang tam pe loin chawlh tir an ni ang. Sorkar chuan he ruahmanna hi sipai hlawh leh pension atana sum tam tak a sen ṭhin tihziaawmna atana a tih nia sawi a ni.

Bihar-a hmun hrang hrangah ṭhalaite hian lungawi lohna lantirin, Agnipath scheme hmanga sipai ṭang zinga 25% chauh chu sipaia ṭang nghet tura lak an nih dawn avangin, hei hian an hmalam hun zel tur pawh a tibuai vek thei dawn tih an sawi.

Mayawati-i'n ngaihtuah ṭha leh turin ngen
Bahujan Samaj Party (BSP) hotu Mayawati pawhin Agnipath scheme hi sawiselin, he scheme hmanga sipai lak chu ṭhalai, a bikin rural area-a chengte tan a dik lo tih sawiin, sorkar laipui chu ngaihtuah ṭha leh turin a ngen.

Mayawati chuan, sorkar lam chuan scheme ṭha tak niin sawi mah se, ram chhunga hmun tam takah ṭhalaite an lungawi lo hle tih a sawi. Sorkar chuan sipaite hamṭhatna dawn turte chu a khuahkhirh sak niin an ngai a, hei hian sipaia ṭang leh an chhungte hma lam hun thlengin a tichhe thei a ni, a ti.

BJP MP Varun Gandhi-a'n a sawisel
BJP MP Varun Gandhi pawhin Agnipath scheme hian ṭhalai zingah lungawi lohna a thlen tam zawk dawn niin a sawi ve bawk.

Defence minister Rajnath Singh hnenah lehkha thawnin, Varun Gandhi chuan Agnipath scheme kaltlanga sipaia lak, Agniveer-te chu kum li hnuah chawlh tir vek an ni dawn a, an zinga 25% chauh sipaia lak ngheh chhoh an nih dawn avangin 75% chu hna nei loin an awm zui dawn a ni, a ti. Kumtin hna nei lo hi an pung chho dawn a, hei hian ṭhalai zingah lungawi lohna a thlen tam dawn thu a sawi.

Kum li chhunga sipaia an ṭan chuan an zirna lamah nghawng neiin, hna dang an zawn lehna kawngah harsatna an tawh phah dawn a ni, tiin hei hian sum lama buaina pawh a thlen phah thei a ni, a ti.