Party worker-te laka Delhi police-te chetdana lungawi loin Congress party MP-ten LS Speaker leh RS Chairman an hmu

Enforcement Direc­torate (ED) in thu zawhfiah tura Congress party hruaitu, Rahul Gandhi a koh avanga lungawi lohna lantirtu, party worker leh hruaitute chunga Delhi police-te chetdana lungawi loin, nimin khan party MP-te chuan Lok Sabha speaker Om Birla leh Rajya Sabha chairman M Venkaiah Naidu an hmu.

ED-in a ni thumna atan Nilaini khan an office-ah Rahul Gandhi hi National Herald newspaper money luandering case-ah thu an zawtfiah leh a ni. Hetih lai hian Congress worker-te chuan ED thiltih dana lungawi lohna lantirin an pungkhawm a, an zingah hian party hruaitu leh MP-te pawh an tel.

Congress MP-te chuan Nilainia an party office kawta lungawi lohna lantira worker pungkhawmte chu Delhi police-te chuan dangin, ṭhenkhat chu tharum nen an hnuksawn lui a, hmeichhiate pawh an dim lo tih an sawi a ni. MP-te chuan an hruaitu Rahul Gandhi chu an thlawpzia lantir a, boruak ṭha tak hnuaia ED office thlenga zui an tum laiin police-te hian lo dangin kutte an thlak zui tih an sawi bawk. An chetdan avang hian police-te chunga action lak an phut thu an sawi bawk a ni.

Nimin vek khan party general secretary leh in-charge-te chuan meeting neiin, Congress hruaitute laka Delhi police-te chet dan chungchanga hma lak dan turte an ngaihtuah ho bawk.