SC-in UP sorkar hnenah hriattirna pe

Uttar Pradesh sorkarin tun hnaia BJP thupuangtu hlui, Nupur Sharma-i'n prophet Muhammad chungchang a sawi dana lungawi lohna lantira nawrh huaihawtnaa tel zinga ṭhenkhat in a tihchhiat chungchangah, nimin khan Supreme Court chuan hriattirna a pe.

Supreme Court chuan UP sorkar hnenah in ṭhiahsak hi danin a phut anga kalpui tur a ni a, midang thungrulh leh tihletna atana tih tur a ni lo, tiin a hrilh. State sorkar bakah Prayagraj leh Kanpur civic authority-te chu insawifiah turin a hriattir a, dan lo leh thil dik lo engmah a thlen tawh lohna tura hma la turin a hrilh nghal bawk.

Hriattirna a pek rualin, court chuan dan loa insak nia sawi ṭhiahsak hna kalpui mek chu a tihtawp tir chuang lo a, "Demolition drive hi kan lo tihtawp sak thei lo a, mahse dan ang taka kalpui tur erawhin kan ti a ni,"a ti.

Nawrh huaihawtna telte in ṭhiatsak an nih chungchangah hian Jamiat Ulama-i-Hind pawl chuan Supreme Court-ah hian zualkoin, in ṭhiahsak an nih dan hi dan kalh a ni tiin, he thila mawphurtu official-te chungah action la tura an phut thu an sawi. In ṭhiahsak an nih dawn chuan UP-a dan an hman mek angin, a hma ni 15-40 chhungin hriattirna hi pek a ni tur a ni, an ti. Mahse UP sorkar chuan hetianga kalpui loin, Kanpur, Prayagraj leh Saharanpur-ah hian BJP hruaitu pahnihte thusawi aṭanga lungawi lohna lantirnaa telte in chu ṭhiahsak an nih hnuah hriattirna hi pek an ni chauh niin an sawi.