EC-in EVM chungchanga Kejriwal-a puhna pawm lo

Election Commission (EC) chuan Aam Aadmi Party (AAP) hotu Arvind Kejriwal-a’n Delhi-a Rajouri Garden assembly by-poll neihna tura EVM leh VVPAT khawl, Uttar Pradesh aṭanga lakte khawih chingpen nia a sawi chu thu dik lo leh belhchian dawl lo a nih thu a sawi.

Delhi Chief Minister Kejriwal-a chuan Uttar Pradesh-a assembly inthlan neihnaa EVM hmante chu Delhi-a hman tum a nih chungchang hi sawiselin, inthlana EVM hmante chu ni 45 chhung tal hmun dangah hman tir loh tur a ni, a ti.

Kejriwal-a chuan Madhya Pradesh-a Bhind biala by-poll neihah pawh EC chuan UP-a EVM hman hnu chu a dah a, Bhind bialah hian VVPAT hman tel niin official-te’n an enchhinnaah pawh a button eng pawh hmeh se BJP poll symbol-a vote thlak angin a in print chhuak zel a, hei hi eptu lam pawhin an sawisel niin a sawi.

Mahse commission chuan UP inthlana EVM hmante chu Madhya Pradesh by-poll neihna atan lakchhuah an ni lo tih sawiin, Kejriwal-a puhna chu thu dik lo a ni, a ti. Commission chuan APP chu EVM mawhchhiat ngawt loin, Punjab inthlana an chak loh chhante zirchiang zawk turin a ti.

Commission chuan EVM-te chu vote thlak a nih hnuah strong room-ah dah vek an ni a, result puan aṭanga candidate-te’n petition an thehluh theih hun chhung ni 45 thleng dah chhunzawm an ni ṭhin niin a sawi. Mahse VVPAT machine-te chu vote chhiar dawnin paper slip-te chu lachuakin, hei hi envelope chhungah dahin EVM nen chuan strong room chhungah dah an nih thu a sawi bawk. VVPAT machine hi chu danin strong room chhungah dah ve kher lo tura a tih avangin a hnua inthlan awm lehnaah pawh hman leh nghal theih a nih thu a sawi.