J&K-a Roingya Muslim-te Myanmar-a thawn dan ngaihtuah dawn

Sorkar laipui chuan Jammu and Kashmir-a Rohingya Muslim 10,000 chuang zet awmte chu an rawn kalna, Myanmar rama thawn kir dan a ngaihtuah dawn.

Rohingya Muslim-te hi dan loin Indo-Bangladesh border leh Indo-Myanmar border bakah Bay of Bengal aṭang tein Jammu and Kashmir-ah hian an lut a, J&K-a Jammu leh Samba district-ah an khawsa ber a ni.

Union Home Secretary Rajiv Mehrishi chuan Thawhṭanni khan high-level meeting koin Rohingya Muslim-te chungchang hi ngaihtuah a ni a, he hunah hian Jammu and Kashmir Chief Secretary Braj Raj Sharma leh Director General of Police SP Vaid-te pawh an tel.

Home Ministry official chuan Rohingya Muslim-te hi thliar fel a, Myanmar lama thawn let a nih dan tur an ngaihtuah dawn tih a sawi.

J&K sorkarin a chhin­chhiah dan chuan an state-a Rohingya awmte hi 5,700 vel an ni a, mahse a takah chuan mi 10,000 aia tam an awm rin a nih thu an sawi. Ramchhung hmun hrang hranga Rohingya Muslim awm hi 40,000 vel an tling tawh a, heng mite hi dan loa ramchhunga rawn lut vek an ni.An zinga ṭhenkhat chu UN refugee body-ah in register mahse India chuan a pawmsak lo a ni.