Agnipath Scheme duh lohna lantirtu pung zel ; Telangana-a nawrh huaihawtnaah mi 1 a thi

Sorkar laipuiin sipai ṭang turte lak dan thar a duan, Agnipath scheme chu ṭhalai tam takin duh loin lungawi lohna an lantir. Nimin khan state pasarih-ah nawrh huaihawt a ni a, hmun ṭhenkhatah chuan kawngpuite dangin, rel an hal bawk.

Bihar-a West Champaran district-ah chuan nawrh huaihawtte hian deputy chief minister Renu Devi chenna in an bei. Bihar state hmun danga nawrh huaihawtten rel halin, bus tukverhte an tikeh a, district pakhata BJP office chu an luhchilh bawk. Nimin khan ṭhalaite hian hmun tam takah rel kawng leh kawngpuite an dang leh a ni.

Uttar Pradesh-ah pawh mipui lungawi loten Ballia rel station chu nimin zing khan luhchilhin, rel pindan pakhat an hal a, rel station bungruate an tichhe bawk a ni. State chhung khawchhak lamah nawrh huaihawtte chu tiang nena thawk chhuakin, rel station pawn lama kawngpuiah police-te nen an innawr buai bawk.

Bihar leh Uttar Pradesh-ah hian hmun hrang hrangah military recruitment policy duh lohna lantirin a hma ni pawhin nawrh huaihawt a lo ni tawh bawk. He policy thar duh lohna hi BJP sorkarna Madhya Pradesh leh Haryana-ah pawh lantir a ni bawk a ni.

Nimina Secunderabad, Telangana-a nawrh huaihawtnaa buaina chhuakah mi pakhat a thi a, mi dang 15 in hliam an tuar. Telangana police-te chuan Secunderabad rel station-a Agnipath scheme duh lohna lantira pungkhawmte lam hawi hian silai an hmetpuak nia sawi a ni. Nawrh huaihawt vang hian darkar thum chhunga rel tlan thei loin an dang a, rel pindan pathum an hal bawk.

Eptu party-te pawhin Agnipath scheme chungchangah sorkar laipui chu na takin an bei zui bawk a ni.

Scheme kalpui ṭan a ni thuai dawn : Rajnath Singh
Ram chhung hmun hrang hranga Agnipath scheme duh lohna lantira nawrh huaihawt a nih mek karah, defence minister Rajnath Singh chuan nimin khan he scheme hi kalpui a ni thuai dawn tih a sawi. Lungawi lohna lantir a nih hnuah sorkar chuan he scheme hmanga sipaia lak theih chin kum bithliah, kum 17.5-21 a tih chu siam ṭhain, kum 23 chinah a ti pung.

Rajnath Singh chuan Agnipath scheme chu ṭhalaite defence system zawm a, ram tana an thawh theihna tura 'golden opportunity' a ni tia sawiin, he scheme hmanga sipaia lut thei tura inbuatsaih nghal turin ṭhalaite a chah. Hri leng vanga kum hnih chhunga sipai lakluh runpui kalpui theih a nih loh avangin mi tam takin an hun ṭha an chan a, hei vang hian an tana hun remchang siamsakna turin prime minister Narendra Modi chuan kum bithliah pawh kum 23-ah a tipung leh ta a ni, a ti. Hei hi batch hmasa ber tan chauh a nih thu a sawi nghal bawk.