Covid-19 hri kai an pung chho leh

India ram chhungah Covid-19 hri kai an pung chho leh a, Ningani khan hri kai hmuh chhuah thar 12,847 awm belh lehin, active case hi 63,063-ah an pung leh tawh a ni.

Ningani vek khan hripui vangin mi 14 an thi a, heng mite nen hian India ramah Covid-19 hri vanga thi hi mi 5,24,817 an tling tawh. Ningania hri vanga thi mi 14 zinga pariat hi Kerala state ami an ni a, Maharashtra-ah mi pathum, Delhi-ah mi pahnih leh Karnataka-ah mi pakhat an thi bawk.

Hri kai mek, active case hi hri kai hmuh chhuah tawh aṭanga 0.15% a ni a; hri kai dam tawh, recovery rate hi 98.64% niin, hri thihpui hi 1.21% a ni bawk.

Ni khata hri kai thar, daily positivity rate hi 2.47%-ah kaiin, weekly positivity rate pawh 2.41% a tling leh tawh tih union health ministry chuan a tarlang.