Rajasthan-ah bawng humhalhtuten Muslim mi sawisa hlum
Rajasthan-ah muslimmi pakhat chu bawng tawlhlutah puhin bawng humhalhtu inti chuan an sawisa a, a hliam tuar loin a thi.
He thil thlenna hmun hi Alwar district a ni. Kum 35 mi Pehlu Khan chu Alwar highway-ah bawng humhalhtu inti chuan midang 15 nen na takin kut an thlak a, Thawhlehni khan damdawi-inah a thi a ni.
Alwar collector Mukhtanand Agarwal chuan Khan leh midangte hian motor paruk hmangin bawng an phur niin a sawi a, a thurualpuite pawh hian hliam an tuar a, damdawi-inah enkawl mek an ni. Rajasthan Bovine Act, 1995 hnuaiah bawng talh tura phurchhuah hi khap a ni. Alwar district-a pawikhawihna thleng vang hian police-te chaun mi paruk bakah, hming hriat loh mi 200 lakah tualthah thubuai a ziak lut.
Pehlu Khan leh midangte hian an bawng phur talh tur ni loin, Jaipur-a Pahsu Mela-a entir tura hruai an nih thu an sawi a, mahse anmahni dangtute hian an motor aṭang hian ṭham chhuakin kut an thlak lui tho a ni. Kut an thlak lai video hi social media lamah thehdarh a ni bawk.
Rajasthan home minister Gulab Chan Kataria chuan bawng humhalhtute thlavang chu hauhin, an kut tuartute chu dan loa thilti an ni, a ti. Minister chuan state chhungah bawng tawlh khap tih an hre chungin an phur lui a, hetihlai hian bawng humhalhtute hian dan loa thiltih hi dan tumin an lo tiding niin a sawi a, kut an thlak erawh chu thil dik lo a ni, a ti.
Thla hmasa khan Jaipur-a hotel pakhat chu bawngsa an siam tel nia sawi a nih avangin mipui thinrimin an lo suasam tawh bawk a ni.