Sa ei khap ngawt theih a ni lo : High Court

Uttar Pradesh sorkarin an state-a dan loa ran talhna in siamte dapin a kharsak mek a, hetihlai hian Allahabad High Court Lucknow bench chuan Constitution Article 21 hnuaia Right to Life and Livelihood chuan thil ei tur chung­changah dikna chanvo a pe a, hei vang hian sa ei hi khap ngawt theih a ni lo, a ti.

HC hian sa zuartu-in a licence renewal sak a ngen chungchang petition a thehluh a ngaih­tuahnaah he thu hi a sawi a ni. Petition thehluttu hi kelsa zuartu niin March 31-a a licence a thih hnuah renew sak a nih loh thu a sawi. Sa zawr chu a eizawnna a nih avangin a licence renew loh chu a tuar hle tih a sawi.

State sorkar chuan court hnenah hian dan loa ran talhna hmun siamte chauh a kharsak thu leh, sa zawrhna dawr kharsak chu an tum anih loh thu a hrilh ve thung a ni. Mahse court chuan sorkar chetdan chuan state chhunga sa zuarte a nghawng hle tih sawiin, an hna leh an sumdawnna kawnga an dikna neihte palzut sak an ni, a ti. State sorkar chuan dan loa thiltite a dapchhuahna kawngah, dan dik taka thiltite a tawrhtir ve kher tur a ni lo, a ti bawk.

Bench chuan, “ Ei tur chungchang chu mimal nun leh duhthlanna a ni a, heng mite tawrhna thleng zawnga thiltih a nih tur a ni lo” tiin, state sorkar chu ni 10 chhugna meeting ko a, sa zuarten an sumdawnna an chhunzawm leh theih dan chungchang ngaihtuah turin a ti.