UP CM-in BJP sawiseltu hnenah legal notice pe

Uttar Pradesh Chief Minister Yogi Adityanath-a chuan National Conference thupuangtu, Junaid Azim Mattu chu BJP sawiselna thu thehdarh ṭhinah puhin legal notice a pe.

National Congress chuan nimin khan hemi chung­changah hian thuchhuah a siam a, UP CM Adityanath-a chaun NC thupuangtu BJP huatna leh sawiselna thu theh­darh ṭhin leh, Adityanath-a chungchang dik lo taka sawi a, Hindu mi­pate chu Muslim hmeichhiate pawngsual tura hrilh anga a sawi avangin CM hian intihhmingchhiat tuma puhin legal notice a pe a ni, a ti.

Legal notice pekah hian Mattu-a hian heng thute mipuiten BJP an huat theihna atana sawi a ni tiin a tarlang. Mattu chu kar hnih chhung ngeia BJP leh Yogi Adityanath lakah ngaihdam dil tura phut a ni a, a dil duh lo a nih chuan dan angin a chungthu relsak a ni ang, a ti.

Mattu chuan legal notice an pek hi chhangin, mi dawihzepte thiltih chuan a tihhlauh loh thu a sawi. Mattu chuan, “Ualau taka Muslim mite chunga tharum thawhtute chuan intihhmingchhiat tum tiin min puh let thung a ni. Adityanath hian thil a hresual a ni. Uttar Pradesh-ah mi tihṭhaih leh rikrap chu politics hmanrua atan a hmang a, Muslim-te chu tih­hming­chhiat tumin a vau a ni”, a ti. Notice a dawn chu a lawyer kaltlanga a chhan let tur thu a sawi bawk.

NC thupuangtu chuan BJP chu sakhaw tlem zawkte dodaltu, a bikin anti-Muslim party a ni, a ti. Kashmir mi a ni leh, Muslim a ni chu a inchhuan thu sawiin, inrahbehna leh inenhranna awmte dolet turin a bei zel dawn tih a sawi.