HP-in state highway hming thlak

Supreme Court-in national highway leh state highway aṭanga km 500 china zu zawrh khapna a siam chuan state hrang hrangah nghawng a nei zel.

Highway bula zu zawrh khapna hi April 1 aṭangin hman ṭan a ni a, mahse Supreme Court chuan a thupek hi siamṭhain, mi 20,000 aia tlem chenna municipal area-ah chuan zu zawrh khapna hi meter 500 chin aṭangin meter 220-ah a tihniam.

Himachal Pradesh chuan Supreme Court thupek avanga highway dunga zu zuarten harsatna tawh tur pumpelhna atan an state chhunga state highway16 chu major district road tiin a thlak.

Rajasthan sorkar pawhin khawpui paltlang state highway section ṭhenkhat chu a hming a thlak a tum bawk a, state Public Works Department chuan heng kawngpuite hi urban road tiin a thlak dawn a ni.

Union Tourism Minister Mahesh Sharma chuan Supreme Court thupek avang hian national leh state highway dunga hotel leh restaurant-ten harsatna an tawk nasa hle tih an hriat thu leh, a chinfel dan kawng ngaihtuahpui a tum thu a sawi. Hemi rual hian sorkar chuan SC thupek huam chinah zel hma a lak tur thu a sawi bawk.