Muslim mi sawisak hlum chungchang House-ah sawichhuak
Rajasthan state-a bawng humhalhtu intiten bawng phurtu Muslim mi panga sawisa, an zinga pakhat an sawisak hlum chungchang chu nimin khan Parliament in hnihah sawichhuah a ni.
Eptute chuan BJP sorkar chu bawng humhalhtu intiten bawng tawlhruk tur an veng tih chhuanlama hmanga ualau taka mi an sawisak pawhin eng mah ti loah an puh. Minister of State for Parliamentary Affairs Mukhtar Abbas Naqvi chuan eptute thusawi chu a dik lo tih sawiin, an sawi ang thil chu a thleng lo niin a sawi. Naqvi chuan an thil sawiho chu fimkhur ngai tak a nih thu leh, House chu bawng talhtute thlawp zawk anga lantir mai a hlauhawm thu a sawi. State sorkar chuan report hi a dik lo niin a sawi bawk a ni, a ti.
Minister chhan danah hian eptu lam an lungawi lo hle a, Rajasthan-a insawisak chungchang chu a hre lo chu mak an tih thu leh, New York Times lam daih pawhin an hriat thu Congress hruiatu Ghuolam Nabi Azad chuan a sawi.
Bawng phurtute sawisak chungchang hi Congress hruaitu Mallikarjun Kharge-in pawhin Lok Sabha inkhawmah a sawichhuak bawk a, Rajasthan sorkar chu a hna thawk loah puhin, hetiang thil hi an state-a a thlen ṭum nga-na a ni, a ti. Kharge-i chuan Home Minister Rajnath Singh chu a ṭul anga hma la nghal turin a phut bawk. Congress vice president Rahul Gandhi chuan Rajasthan-a insawisakna thleng chuan dan leh thupek kenkawh kawngah sorkar hlawhchhamna a tilang a ni, a ti.