Covid-19 kai enkawl dam 63.01% an tling tawh
Ram chhungah hripui kai nasa takin pun belh reng mah se enkawl dam tawh pawh an tam hle a, Ministry of Health and Family Welfare-in nimina report a tihchhuahah chuan Covid-19 kai enkawl dam 5,53,471 an awm tawh a, enkawl dam tawh rate hi 63.01% a tling tawh.
India ramah hian hri kai ṭantirh aṭanga nimina sorkarin report a tihchhuah thleng khan hri kai 8,78,254 an awm tawh a, report an tihchhuah hma darkar 24 chhung khan hri kai hmuh chhuah thar 28,701 an awm leh a, hei hi India rama ni khata hri kai tam ber record a ni leh. Hetihlai hian darkar 24 chhunga dama puan 18,850 lai an awm leh a ni.
Tunah hian rampumah hri kai mek 3,01,609 an la awm a, enkawl dam tawh aiin nuai 2.5 chuangin an tlem tawh zawk. Hri vanga thi 500 lai awm lehin nimin thleng khan India ramah Covid-19 vanga thi 23,174 an awm tawh bawk.
Indian Council of Medical Research (ICMR) chuan darkar 24 chhungin Covid-19 sample 2,19,103 an test tih an tarlang a, hri len ṭantirh aṭanga nimin thleng khan sample 1,18,60,256 an test tawh a ni. Ram chhung hmun hrang hrangah ICMR pawmpui sample test-na laboratory 1200 a awm tawh a, sorkar laboratiry 852 leh private laboratory 348 a awm.
Maha-ah hri kai nuai 2.5 chuang tawh
India ram chhunga hri kaiin a nghawng nat ber state Maharash-tra-ah chuan hri kai 7,827 hmuh chhuah thar an awm leh a, hei nen hian mi 2,54,427-in Covid-19 an kai tawh. Enkawl dam 1,40,325 lai awm ve bawk mah se hri kai mek 1,03,813 an la awm a, 10,289 zetin an thihpui tawh. Tamil Nadu-ah chuan hri kai 1,38,470 an awm tawh a, 1,966-in thihpui tawhin 89,532-in an dampui tawh a, 46,972-in an la kai mek thung. India ram khawpui Delhi-ah chuan hri kai 1,12,494 an awm tawh a, dama puan 89,968 awm tawhin 19,155-in an la kai mek a; 3,371-in an thihpui tawh bawk a ni.