Rajasthan-a Congress sorkarin buaina tawk CM lakah Deputy CM Pilot a hel

Rajasthan-a Congress sorkar chuan buaina a tawk mek a, deputy chief minister Sachin Pilot chu chief minister Ashok Gehlot leh a kaihhruai sorkar lakah a hel a, Pilot hi MLA eng emaw zatin an thlawp nia sawi a ni. 

Party thuneitu sang lamin an party chhung buaina chinfel tumin hma an la nghal a, Delhi aṭangin party senior leader Randeep Singh Surjewala, Ajay Maken leh Avinash Pande te chu Jaipur-ah tirin, nimin khan party legislature meeting an nei nghal.

Member 200 awmna, Rajasthan  assembly-ah rorellai Congress hian member 107 neiin BJP  in 72 a nei a ni. Sachin Pilot hian an party MLA 30 chuangin an thlawp niin a sawi a, mahse nimin khan Congress MLA 97 chuan CM Gehlot hi an thlawp thu an sawi thung. 

Congress party chuan sorkar siam tura MLA ngai zat hi 101 niin, an party MLA bakah an thawhpui dangte nen, MLA 109 in CM Gehlot hi thlawpin, sorkar dinhmun a derthawng lo niin a sawi. 

Party senior leader, Randeep Surjewala chuan chhungkaw buaina chu chhungkua bawkin an chingfel thei a ni tih sawi­in, Sachin Pilot leh a thu­rualpui MLA dangte pawh inremna siampui turin an inhawng reng tih a sawi. 

An harsatna leh lung­awi lohnate pawh ngaih­thlak sak a, chinfel dan ngaihtuah a ni ang, a ti. 

Kum 2018 assembly inthlana Congress party-in hnehna an chan khan, chief minister atana dah tur chungchangah Pilot leh Gehlot inkarah hian inepna a awm ṭan tawh a ni. Sachin Pilot hi party state president atana dah niin, inthlana an party-in hnehna an channa kawngah tha thawhtu pawimawh tak a ni. Hei vang hian CM atana dah pawh a inbeisei a, party senior leader Gehlot nen CM dinhmun hi an inchuh a ni. Central lama party hruaitute an inrawlh  hnuah, Ashok Gehlot chu CM atana dah niin, Pilot hi a deputy CM ah dah a ni ta zawk a ni.  

Tun ṭuma  Sachin Pilot lungawi lohna chhan hi Chief Minister Gehlot-a'n BJP in Congress sorkar paihthlak tumin, an party MLA ṭhenkhat suma lei an tum nia a sawi chungchangah, Rajasthan police-a Special Operations Groups (SOG) in thu zawhfiah tura kohna an pek vang a ni. 

CM hi home ministry changtu a ni bawk a, hemi chungchang hi police-ten a hnenah an report a ni. Sachin chuan he thila hriattirna pek a ni hi tihmualpho tumna leh, BJP thurualpuia Congress sorkar paihthlak tuma puhna angah a ngai. Gehlot nena an inkar boruak a lo ṭha lo sa nen, CM lakah a hel ta a ni. 

Sachin Pilot hi chief minister Gehlot laka a hel avangin Congress chhuahsanin BJP a zawm dawn nia thuthang a awm nghal a, mahse Pilot chuan BJP a zawm dawn lo tih a sawi. 

Pilot hi Delhi-ah a awm mek a, party hruaitu Sonia Gandhi leh Rahul Gandhi-te nen la inhmu lo mah se, an inbepawp reng nia sawi a ni.