Agnipath Scheme duh lohna lantir chhunzawm zel ; Sorkarin Agniveer-te tan ruahmanna thar a siam belh

Sorkar laipuiin sipai lakna tur scheme thar a siam, Agnipath Scheme chu ram chhung hmun hrang hrangah ṭhalaiten duh lohna an lantir chhunzawm zel. Hetih lai hian sorkar chuan lungawi lote bengdaihna turin, he scheme puitu tur ruahmanna thar a siam belh.

Scheme duh lohna lantira ni li nawrh huaihawt a nih chhungin, Railways chuan rel 369 a cancel tawh a, heng zingah hian mail/express train 210 a tel. Nawrh huaihawtna hmun eng emaw zatah tharum thawhnate a thleng a, nawrh huaihawtna lian ber, Bihar-ah chuan mi 250 chuang man an ni tawh.

Eptu party-te pawhin he scheme hi sawiselin, reilotea ṭhalai tam tak hna nei loa siamna tur a ni, an ti. Congress hruaitu Priyanka Gandhi Vadra chuan boruak ṭha tak hnuaia scheme duh lohna lantirtute chu an thlawp tih a sawi. Rahul Gandhi pawhin prime minister Narendra Modi chu hna zawng mekte tana beiseina dik lo siamsaktuah puhin, he scheme hian ṭhalaite chuan hna thawh chhunzawmna tur awm lohna tur lam kawng an zawh dawn a ni, a ti. BSP hruaitu Mayawati pawhin Agnipath scheme chuan ṭhalaite a tihnual hle tih a sawi bawk.

Agniveer-te tan ruahmanna siam belh
Agnipath Scheme kaltlanga sipaia lak, Agniveer tihte hi kum li sipai an ṭan hnuah chawlhtir an ni dawn a, pension erawh an nei dawn lo a ni. Agniveer zinga 25% chauh hi sipai ngheta lak leh tur an nih avangin, sipaia ṭan tum ṭhalai tam tak chuan he ruahmanna hi an duh lo a, kum li hnuah ban leh vek an nih dawn avangin an tan hna dang zawn lehna kawng thlengin a nghawng buai dawn niin an sawi a ni.

Sorkar chuan ṭhalaite lungawi lohna pakhat beng daihna turin, Agniveer-te tan ruahmanna a siam belh a,sipaia kum li an ṭan hnua ministry hrang hranga an luh theihna tur remchang siamsak a ni dawn tih a sawi.

Ministry of Home Affairs (MHA) chuan Central Armed Police Forces (CAPF) leh Assam Rifles sipai laknaah Agniveer-te tan 10% dah a ni dawn tih a sawi a, hei bakah CAPF leh AR-a sipai luh thei chin kum bithliah chu kum thuma tihpun a ni dawn tih a sawi bawk.

Defence minister Rajnath Singh chuan defence post - Indian Coast Guard, defence civilian post leh defence PSU 16-ah Agniveer tan hna 10% dah a ni dawn tih a puang bawk a, hemi atan hian recruitment rules pawh a ṭul dan anga siamṭhat a ni dawn tih minister thuchhuah chuan a tarlang.

Ministry of civil aviation and shipping pawhin Angniveer, thiamna ṭha tak neite tan an ministry-a service hrang hrangah an luh theihna tur remchang an siam dawn tih a sawi ve bawk.

Ministry of ports, shipping and waterways chuan Agnipath scheme chu Agniveer-te shipping sector lama an luh theihna tura puitu a ni dawn tih sawiin, hemi atan hian an ministry leh Indian Navy-te chuan hma an la dun zel dawn a ni, a ti.

Department of School Education and Literacy chuan an autonomous institution, National Institute of Open Schooling (NIOS) kaltlangin, Agniveer-a lut, Class 10 pass chinte chu Class 12 pass certificate an neih leh theihnan an zirna kawnga puihna turin, defence lam thuneitute nena inberawnin special programme a siam dawn tih a sawi bawk.

Skill India and the Ministry of Skill Development and Entrepreneurship (MSDE) chuan Armed Forces-a wing hrang hrangte nena thawkhoin, Angiveer-te chu civil hna lamah pawh an luh theihna turin an service laiin training an pe dawn a, Skill India certification pein, hei hian entrepreneurship leh civil hna dang dang an zawnna kawngah a pui thei dawn a ni.

State sorkar eng emaw zatin Agnipath scheme hnuaia sipai kum li ṭang, Agniveer-te chu kum li an hman zawh hnuah, state police force laknaah duhsak an ni dawn tih an puang tawh bawk.