Prophet chungchang vanga buaina chhuakah UP-ah mi 415 man an ni tawh

BJP spokesperson aṭanga hrem tak, Nupur Sharma-i'n prophet Muhammad chungchanga a sawidan avanga lungawi lohna lantirna kaihhnawihah, Uttar Pradesh police-te chuan mi 415 an man tawh a, FIR 20 an ziak lut tawh bawk.

TV debate-a Nupur Sharma thusawi avang hian UP-a district hrang hranga lungawi lohna lantirin, buaina a chhuak zui a ni. Kanpur-a nawrh huaihawtte leh police-te innawr buaina avangin mi 40 in hliam an tuar a, an zingah hian police 20 an tel.

Punjab, Delhi, Maharashtra, Gujarat, West Bengal, Jharkhand leh Uttar Pradesh-ahte prophet Muhammad sawichhiat a nih vang hian lungawi lohna lantirin buaina a chhuak a, buaina chhuakah hian mi pahnih an thi tawh a ni.

All India Majlis-e-Ittehadul Muslimeen (AIMIM) chief Asaduddin Owaisi chuan Nupur Sharma hi man nghal tura a phut thu leh, dan ang taka hremna pe ngei tura a phut thu a sawi. BJP chuan Sharma chu an hum tlat nia sawiin, nakin lawkah chuan hruaitu lian taka an siam chho ang a, Delhi CM candidate-ah pawh an la dah theih thu a sawi bawk.