UP-a sorkar officer-te thil neih zat puanzar turin hriattir

Uttar Pradesh Chief Minister Yogi Adityanath-a chuan an state chhunga sorkar officer-te chu an thil neih zat puangzar vek tura a hriattir hnuah, hemi atan hian April 15 thleng hun a pek belh.

State chhungah hian IAS bakah state officer leh hnathawk tam tham tak an awm a, CM chuan lakluh a nih tukah officer-te hi thilneih zat hi ni 15 chhunga puanzar vek turin a hriattir a ni. Mahse an zinga a tam zawk chuan hun pek chhung hian form-te an tihfel hman loh vang­in Ningani khan sorkar chuan April 15 thleng hun a pek belh leh a ni.

Senior official chuan officer tam zawk chuan an thil neih puanzarna tur form-te hi an la tifel hman lo a, IAS officer-te chuan kumtinin an thil neih zat hi an tarlan ziah a ngai a, mahse state officer zinga tam tak chuan an la tifel thei mai lo a ni, a ti.

Officer-ten form an fillup turah hian an hminga ram leh in an neihte kimchang taka tarlan a ngai a, ram leh in chu an rochun nge an lei tihte pawh ziahlan a ngai dawn a ni. Hei bakah bank account-a an sum neih zat kimchang te, investment an tih te pawh tarlan tel vek a ngai bawk.

CM Adityanath-a hian offi­cer-te bakah minister-te pawh an thil neih zatte puangzar vek turin a ti bawk. Minister leh officer-te thil neihte hi sorkar website-ah tarlan vek a ni ang.