Agnipath Scheme duh lohten 'Bharat Bandh' huaihawt ; Sorkarin scheme sut dawn lo, registration tih ṭan hun a puang

Sorkar laipuiin sipai lak dan tur thar a duan, Agnipath scheme duh lohna chu ram chhung hmun hrang hrangah lantir chhunzawm zel a ni. Nimin khan he scheme duh lotu pawl hrang hrangte chuan ram pum huapin lungawi lohna, 'Bharat Bandh' an huaihawt.

Ram chhung hmun hrang hrangah lungawi lohna lantir a ni chungin sorkar laipui chuan Agnipath scheme hi sut a ni dawn lo a, kaltlangpui a ni dawn tih a sawi. Nimin khan Army chuan he scheme kaltlanga sipai lak runpui neih turah notificiation a tichhuak a, July 22 aṭangin registration tih ṭan a ni dawn tih a puang.

Nimina nawrh huaihawt avang hian hmun hrang hrangah rel 500 chuang cancel a ni leh a, nawrh huaihawtte hian rel kawng leh kawngpuite an dang. Ni nga chhung nawrh huaihawt a nih tawh avangin railways lamin an tuar nasa hle a, rel station ṭhenkhat beih a nih bakah, rel pindante pawh an hal a ni. State hrang hranga nawrh huaihawt zinga mi 1,238 man an ni tawh.

Congress party hruaitute Agnipath scheme duh lote an thlawpna lantirin, nimin khan Delhi-a Jantar Mantar-ah lungawi lohna an lantir. Connaugh Place bula Shivaji Bridge railway station-ah rel an tihdin avangin Youth Congress worker ṭhenkhat chu man an ni.

West Bengal chief minister, Trinamool Congress hotu Mamata Banerjee chuan BJP kaihhruai sorkar laipui chuan Agnipath scheme hmang hian ama pual 'armed' cadre din a tum niin a puh. He scheme hi armed force hmusitna a ni, a ti.

Karnataka chief minister hlui, Kumaraswamy pawhin Agnipath chu Nazi movement inṭanna tur nia sawiin, Rashtriya Swayamsevak Sangh (RSS) chuan sipaite thununna atan Agniveer-te chu an hmang dawn a ni, tiin a sawi.

July aṭangin recruitment kalpui dawn
Indian Army chuan Agnipath scheme hmanga sipai lak runpui chu July aṭangin a nei ṭan dawn.

Nimina hriattirna a tihchhuahah, Indian Army-a ṭan tumte tan, (medical branch huam tel loin) Agnipath chauh chu luh theihna tur a ni tih a tilang. Recruitment rally hi 83 neih a ni ang. He scheme kaltlanga sipaia lak turte hian scheme duh lohna lantirnaa tharum thawhna leh pawikhawihna thlenaahte an inhnamhnawih lo tih certificate, police-in an hriatpuina an neih a ngai dawn. 

Nawrh huaihawt chungchanga FIR thehluha an hming langte chu sipaiah hian an lut thei dawn lo tih department of military affairs-a additional secretary Lt Gen Puri chuan a sawi. November thlaah Navy lam pawhin mipa leh hmeichhiate tan recruitment thawh khatna hi a nei dawn bawk.

Thu dik lo thehdarha puh WhatsApp group 35 khap
Agnipath scheme chungchanga thu dik tawk lo thehdarh nia sawi, WhatsApp group 35 chu Pathianni khan sorkar laipui chuan a khap tih a sawi.

Sorkar laipui chuan social media platform, a bikin WhatsApp chu scheme chungchanga thu dik lo thehdarh a, nawr huaihawt tura midangte fuihna atana hman a ni nasa tih a sawi. Hei vang group 35 pawh hi khap an ni a, mahse heng group administrator-te chungah hian action lak a ni em tih erawh a sawilang lo.

Ministry of home affairs chuan Agnipath scheme chungchanga dawt thu thehdarh leh nawrh huaihawttua puh mi 10 man an nih tawh thu a sawi.