ED office-ah Rahul Gandhi ko leh

Enforcement Directorate (ED) chuan a ṭum lina atan National Herald newspaper money laundering case-ah nimin khan Congress hruaitu Rahul Gandhi chu thu zawhfiah turin an ko leh.

Rahul Gandhi hi June 17 khan ED office-ah hian inlan leh turin an ti a, mahse a nu Sonia Gandhi dam loh avangin a hun hi sawn tura ED a ngen hnuah, nimina inlan tur khan an sawnsak a ni. Kar liam ta khan ni thum thu zawhfiah turin office-ah hian koh a lo ni tawh a, darkar 30 chhung vel thu an zawtfiah tawh a ni.

ED-a Rahul Gandhi inlan tura koh a nih avangin Delhi-a Congress party chuan lungawi lohna leh, Rahul Gandhi an thlawpna an lantir a, BJP kaihhruai sorkar laipui chu politics lam a khingpuite beihna atana central agency-te dik lo taka hmangah an puh. Kar liam taa lungawi lohna lantira Delhi-a an party headquarters-a an punkhawmnaa Delhi police-ten an luhchilh chungchang leh, party MP-te chunga police-te chet dan mawi lo tak chungchangah Congress party hruaitute chuan nimin khan president Ram Nath Kovind hmuh an tum.