RSS hotuin rampumah bawng talh khapna dan siam a duh

RSS hotu Mohan Bhagwat chuan rampum huapa bawng talh khapna dan siam a duh thu a sawi a, hemi rual hian bawng humhalhtu pawl intite chu bawng venhim an tumna kawngah dan leh thupek ngai pawimawh turin a chah.

Nimina Lord Mahavir piancham lawmna inkhawm buatsaiha thu a sawiah, RSS hotu chuan he thu hi a sawichhuak a ni. Mahse bawng humhalhtu pawlten tharum thawhna an thlen ṭhin chu a duh loh thu a sawi.

Tun hnaiah ramchhung hmun hrang hrangah bawng humhalhtu pawlten pawikhawihna an thlen fo a, Rajasthan-a Alwar district-ah bawng phur nia puh Pehlu Khan chu bawng humhalhtu intiten an sawisa hlum a, he pawikhawihna thlenga inhnamhnawiha puh mi 10 chuang man an ni tawh.

Bawng humhalhtuten pawi­khawihna an thlen chungchang hi Parliament inkhawmah pawh sawichhuah a ni a, eptute chuan tharum thawhna thleng hi an dem thu an sawi.

RSS hotu Bhagwat hi president thar thlan huna candidate turin a hming sawirik a ni. Shiv Sena chuan President Pranab Mukherjee term a zawh hunah amah thlaktu atan Bhagwat hi an duh thu an sawi a, Shiv Sena MP Sanjay Raut chuan, India chu Hindu rama din a nih theih nan, Shiv Sena President Udhhav Thackeray pawhin Bhagwat chu President-a dah ngei ṭha a tih thu a sawi. President Mukherjee-a hian kuminah a term hi a hmang zo dawn a ni.