Bengaluru-ah Kristian-te inkhawm tur titawp

Bengaluru-a Kristianten prayer meeting an buatsaih tum chu sakhaw dang zuitute Kristian-a inlehtir tumna a ni tia complaint a luh vangin ṭhulh a ni. He inkhawm hi Inrinni leh Pathianni khan neih tum a ni.

Prayer meeeting neih tura ruahmanah hian America aṭangin thuhrilhtu pahnih rawih tum a ni a, mahse Hindu pawl Bajrang Dal chuan an dodal avangin inkhawm buatsaih a nih hma darkar 12 vel chauh a la awm tihah ṭhulh a ni. Uttar Pradesh-ah hian UP Chief Minister Yogi Adityanath-a din, Hindu Yuva Vahini-te chuan Kristian-te’n prayer meeting an neih chu tihluihna hmangin an sakhuaa midang an inlehtir nia puihna an tihtawp tir a, mahse an hnuah an puhna hi thu dik lo a ni tih hriat a ni.

Bengaluru-a prayer meeting neih tur chungchangah hian kar kalta Zirtawpni khan Girish Bhardwaj chuan Foreigners’ Regional Registration Office complaint a thehlut a, American evangelist lo kal turte chu Kristiana midangte inlehtir tuma lo kal tur an ni tiin, hei hian an visa norm pawh a palzut niin a sawi. Zirtawpni tlai khan Bajrang Dal convenor Keshav Nayak chuan police-ah complaint thehlutin, Kristiante prayer meeting buatsaih tur chu Hindu-te an sakhua inlehtir an tumna a ni tiin, an sakhuaa zawm tir an tumnaah hian pawisate pawh an sem niin a sawi.

Hetih lai hian prayer meeting huaihawttute chuan an puhna chu thu dik lo a nih thu an sawi a, retreat pawh an buatsaih fo tih sawiin, sakhaw dangte kristian-a inlehtir an tum loh bakah, an hun buatsaihah pawh Kirstiante chauh an tel ṭhin tih an sawi. Kristian sakhua zawm tura thlem a, pawisa pawh an sem nia an puhna chu chhangin, meeting an buatsaiha tel turte hian pawsa Rs 100 an chawi a ngai zawk niin an tarlang.