RK Nagar-a by-election neih tur thulh

Election Commission chuan Chennai-a Radhakrishnan Nagar Assembly constituency-a by-election neih tur chu ṭhulh a nih thu Pathianni zan khan a puang a, hei hi sum hmanga vote leina a awm nia sawi a nih vang a ni.

RK Nagar hi Tamil Nadu chief minister hlui leh AIADMK hotu hlui, J Jayalalithaa-i bial hlui a ni a, April 12-ah by-election hi neih tura tih a ni.

EC chuan by-election neih turah hian vote leina atan sum leh thilpek an semchhuak nasa tih thawm a awm vangin inthlan neih tur hi ṭhulh a nih thu leh, hun remchang dangah a buatsaih tur thu a sawi ta a ni.

Tamil Nadu-a rorellai, All India Anna Dravida Munnetra Kazhagam (AIADMK) deputy general secretary TTV Dinakaran chuan EC thutlukna siam chu na takin a sawisel a, "Hei hi thil dik lo a ni a, Election Commission hian hnehna chang turin min duh lo a ni. Inthlan hun chu an tikhawtlai thei a, mahse an la buatsaih tho a ngai dawn a ni", a ti. Dinakaran hian by-election neih turah hian AIADMK-a Sasikala-i lamṭang aiawhin chuh a tum a, nomination pawh a thehlut tawh a ni.

Income Tax team chuan inthlan kaihhnawihah pawisa hman tur tham thamtak an man avangin EC hian inthlan neih tur hi a ṭhulh a ni. IT Depatment hian kar kalta Inrinni khan Sasikala-i lamṭangte chuan RK Nagar-a voter-te hnenah cheng vaibelchhe 100 vel an sem niin a sawi a ni.

Kar kalta Zirtawpni khan IT official-te chuan Tamil Nadu Health Minister C Vijayabaskar, a chhungte leh sumdawnna lama a thawhpuite in chu an lo dap tawh bawk a, pawisa fai cheng vaibelchhe 5.5 an man. Document an man tel aṭangin Sasikala-i lamṭangte hian RK Nagar biala voter tinte hnenah Rs 4,000 an sem nia hriat a ni bawk.

RK Nagar by-election neih turah hian AIADMK hnuaia pawl pahnih, O Panneerselvam leh VK Sasikala-i lamtangte chuan candidate hran ve ve siamin an inbei na hle a, Pathianni pawh khan pawl hnihte hi intibuaiin mi pakhatin hliam a tuar a ni.

Tun ṭum hi EC-in Tamil Nadu assembly inthlan neih tura sum hmanga voter-te lei tum a nih avanga inthlan a cancel ṭum hnihna a ni. Nikum khan poll official-te'n sum tam tam tak an man avangin Thanjavur leh Aravakurichi-a May 16-a vote thlak tur chu ṭhulh a ni a, November 19-a inthlan hi buatsaih a ni ta zawk a ni.