Ni li cham turin Australia PM a rawn zin
Australia Prime Minister Malcom Turnbull chu ni li cham turin Pathianni khan New Delhi a rawn thleng. Prime Minister Narendra Modi nen inkawmin, ram pahnihten defence, secuiriy, energy leh trade lama an thawhdunna tihlen dan turte an sawidun.
Turnbull hian kum 2015-a Australia PM atana lakluh a nih hnua India ram a rawn tlawhna hmasa ber a ni. A cham chhung hian ram pahnihte thawhdunna tur inremna thuthlung eng emaw zat ziahfel beisei a ni.
Australia-a High Commissioner to India Harinder Sidhu chuan ram pahnihten free trade inremna an siamna tur, Comprehensive Economic Cooperation Agreement (CECA) chungchang chu buaipui mek ni mah se, Turnbull-a cham chhung hian ziahfel a ni dawn lo tih a sawi. CECA atana inbiakna hi ram pahnihte hian kum 2011 aṭang khan an nei ṭan a, kum 2014-a khatih laia Australia PM Tony Abbott a rawn zin ṭhum khan kum 2015 kumtawp lamah ziahfel hman an duh thu pawh an lo sawi tawh a ni.
Australia-in India hnena uranium a supply tur tihkhawtlai chungchang pawh ngaihtuah a ni dawn a, External Affairs Ministry Joint Secretary (South) Jaideep Mazumdar chuan Australia parliament pawhin nikum khan uranium supply na tur hi a lo pawm tawh niin a sawi. Inbiakna neih mek a ni a, thutlukna fel fai erawh an la siam thei lo a ni, a ti.