BJP MP thupha chawi turin phut

BJP MP Tarun Vijay chu South India mite thliar hrang zawnga tun hnaia thu a sawi avangin nimina Parliament inkhawmah thupha chawi turin eptuten an phut.

Akali memmber Prem Sing Chandumajra chuan Vijay hian a thu lo sawi tawh vang hian ngaihdam a dil ngei tur a ni, a ti.

BJP MP Vijay hi tun hnaia Greater Noida-a African zirlaite kut thlak an nih chungchangah, Al Jazeera news channel online show, The Stream-ah a lang a, hemi ṭuma South India mite chungchang a sawi dan chu social media lamah pawh a darh nasa hle. India ram leh a culture chungchang an sawihonaah, minister chuan African miten enhran an tawk nia puhna chu a pha a, "Chi inthliarna labing chi ni ila, engvangin south mite hi an awm ve ang. Tamil, Kerala, Karnataka leh Andhra te hi engvangin kan awmpui ang? Kan chhehvelah mihang/black people chu kan nei ve reng a lawm" tiin a sawi a ni.