ED-in darkar 40 chhung Rahul Gandhi thu zawt tawh ; A vawi 5-na atana inlan turin nimin khan a ko leh

Enforcement Directorate chuan National Herald money laundering case-ah Congress party hruaitu Rahul Gandhi chuan ni li chhungin darkar 40 zet thu a zawtfiah tawh a, nimin khan an office-a inlan turin a ko leh bawk.

Kar liam ta khan Thawhṭanni aṭanga Nilaini thleng Rahul Gandhi hi darkar 30 chuang thu zawhfiah a ni tawh. Tunkarah Thawhṭanni khan ko lehin, darkar 10 chuang thu an zawt leh a, zanlai pelhah office hi a chhuahsan thei chauh a ni.

ED hian Young Indian-in Congress mouthpiece, National Herald newspaper enkawltu, AJL (Associated Journals Limited) a lakchhawn chungchanga Rahul Gandhi inhnamhnawih dan hi an chhui a ni. Income Tax department chuan Young Indian hian AJL thil neih, Rs vbc 800 chuang hu hi a lachhawng a, Young Indian-ah hian Sonia Gandhi leh Rahul Gandhi-te hian share an neih ve vangin a thil neihah hian tax an pek ve a ngai niin a sawi. Hetih lai hian Congress party chuan Young Indian chu non-profit organisation a nei a, shareholder-ten a thil neih aṭangin engmah sum an lakluh phah lo tih a sawi thung.

Damdawi-in aṭangin Sonia Gandhi chhuak
Congress president Sonia Gandhi chu Covid hri kaihhnawih avanga Delhi-a Sir Ganga Ram Hospital-a dah luh a nih hnuah nimin khan a chhuak a, doctor-te chuan in lamah chawl hahdam turin an ti.

National Herald case-ah ED hian Sonia Gandhi pawh hi June 8 khan thu zawhfiah turin a ko a, mahse damdawi-ina dah a nih tak avangin a inlan hun tur hi June 23-ah a sawn sak. June 23-ah hian a inlan thei dawn em tih hriatchian a la ni lo.