BJP leh eptu party-ten President candidate tur ngaihtuah

India President thar thlanna neih turah rorellai, BJP bakah eptu party-te chuan an candidate tur ngaihtuahin nimin khan meeting an nei ve ve. President thar tur hi July 18-ah thlan a ni ang.

President thlanna neih tura chuh tumte tana nomination thehluh theih hun hi June 19 thleng a ni a, mahse rorellai leh eptu lamte hian candidate an la siam fel lo a ni. BJP hian Electoral College-a vote 49% a nei a, mahse President tling tur hian 50% hmuh tlin a ngai dawn a ni.

BJP parliamentary board chuan nimin khan President candidate tifel turin meeting an nei a, prime minister Narendra Modi pawhin virtual hmangin a telpui a ni. BJP hian inthlan neih tur buapui tur hian member 14 awmna, management team pawh a lo din tawh a ni. Party president JP Nadda leh union minister Rajnath Singh-te chu National Democratic Alliance (NDA) hnuai leh, non-NDA, non-UPA zinga thawhpui tur ngaihtuah tura mawhphurhna pek tel an ni bawk.

Eptu party-te pawhin nimin khan meeting neiin, joint candidate tur an ngaihtuah ve bawk. Eptuten joint candidate atan ruat an tum pathum - National Congress Party (NCP) Sharad Pawar, Jammu and Kashmir National Conference hruaitu Farooq Abdullah, leh Mahatma Gandhi-a tupa, Gopal Krishna Gandhi-te chuan an hnar a, candidate tur hi an la tifel thei lo a ni. Hei vang hian nimin khan Sharad Pawar chenna inah eptu party 17 hruaitute inhmukhawmin, joint candidate tur hi an ngaihtuah leh a ni.