PM zirna chungchang ziah vangin Kejriwal manna tur tichhuak

Delhi Chief Minister Arvind Kejriwal chuan a twitter-ah Prime Minister Narendra Modi-a educational qualification chungchangah zawhna a siam avangin nimin khan Assam court chuan Delhi CM manna tur thupek hi a tichhuak.

Aam Aadmi Party (AAP) hotu Kejriwal hian tunhnaiah buaina a tawk chho fo a, union finance minister Arun Jaitley chuan tihhmingchhiat tumah puhin Delhi court-ah thubuai a lo ziak lut tawh bawk.

Nimina Assam court-in thupek a tihchhuah hi bailable warrant a ni a, Karbi Anglong district-a judicial magistrate Naba Kumar Deka Baruah chuan AAP hotu hi April 7 khan court-ah inlan tura tih a ni chunga a inlan loh avangin manna tur thupek hi tihchhuah a nih thu a sawi.

Arvind Kejirwal-a hian nikum December 15 khan a twitter-ah, PM Modi chu pawl 12 chauh pass a ni a, a bak degree dang a neihte chu a lem vek a ni, tiin a sawi. Hemi hnu lawk hian Assam-a Karbi Anglong Autonomous Council member Surjo Rongphar chuan Kejriwal-a hi Modi-a tihhmingchhiat tumah puhin Assam court-ah thubuai a thehlut a ni.

Kejirwal-a ukil, Gupreet Singh Uppal chuan Assam court-a inlan tura koh a nih chungchangah, April 23 khian Delhi civic election neih a nih dawn avangin CM Kejriwal-a hi a buai hle a, a tan kal ngaihna a awm lo a ni, a ti.

Delhi CM chuan Modi-a hian a education qualification chungchangah mipuite thu dik tawk lo a hrilh nia sawiin, college leh university certificate a nei nia a sawite chu mipui hmuha tlangzarh turin a phut a ni.

Congress party chuan Kerjiwal-a manna thupek tihchhuah a nih hnuah, PM chu eng vanga a pawl zat chungchang zep tlat nge a ni tih an zawt ve leh. Congress hruaitu Digvijaya Singh chuan, "India ram mipuite hian kan prime minister lehkha zir thlen zat hre turin dikna kan nei lo em ni? Engvangin hei hi zep tlat a nih?" tiin a zawt. Hemi rual hian PM hian mipuite hnena dawt a lo hrilh fo tawh avangin, a zirna chungchangah dawt a sawi a nih pawhin thil mak vak a ni dawn lo niin a sawi bawk.