MP-te'n Pakistan court thutlukna dem

Pakistan court-in Indian naval officer hlui, Kulbushan Jadhav-a thi tura a chungthu a relsak chu Parliament inkhawmah member-te chuan an dem thu sawiin, sorkar laipui chu Jadhav-a India rama him taka hruai kir a nih theih dan ngaihtuah turin an phut.

Nimina Parliament inkhawmah Home Mi­nister Rajnath Singh chuan sorkar chuan navy officer hlui hruai haw a nih theih nan hian theih­tawp a chhuah dawn tih a sawi. Minister chuan, "Thi tura hremna pek a ni hi India chuan na takin a dem a ni. Dan leh thupek palzut a ni a, Kulbushan Jadhav hian rorelna dik a hmuh theih nan sorkarin a bei zel dawn a ni", a ti.

Congress party chuan Jadhav-a chhanhim a nih theih nan Prime Minister Narendra Modi chu inrawlh turin an lo phut tawh bawk.

Jadhav-a hi nikum March thla khan Pakistan sipaiten an man a, enthlatuah puhin thubuai siamsak a ni. Thiam loh chantir a nih hnuah Thawhṭanni khan Pakistan military court chuan tihhlum turin a chungthu a relsak ta a ni.

Congress hruaitu Mallikarjun Kharge chuan Pakistan chuan thu belhchian dawl lo hmangin Jadhav chu thiam loh a chantir a, hetihlai hian sorkar laipui chu ala ngawi reng a ni, a ti. Sorkar chu a theihna te hmang a, Jadhav-a chhanchhuah chu a mawhphurhna a ni tih hre tura an phut thu a sawi.