BJP hruaituin Mamata lu manah Rs 11 pek tiam

West Bengal-a BJP youth wingh hruaitu, Yogesh Varshney chuan Chief Minister leh Trinamool Congress hruaitu, Mamata Banerjee-i lu manah cheng nuai 11 pek a phal thu a sawi.

Bharatiya Janata Yuva Morcha member Varshney hian, Pathianni-a Bihrbum-a rally neih ṭuma police-te chetdan a sawiselnaah, Chief Minister vauna thuchhuah hi a siam zui a ni. Hanuman Jayanti puala kawngzawh huaihawta telte hi police-te chuan tiangin an lo vua nia sawiin, Varshney chuan he thila mawhphurtah hian CM hi a puh a, Mamata chu ramhuai sual tiin a sawi.

Varsney chuan, “Video-a police-te chetdan ka hmuh hian ka rilru-ah thil pakhat chauh a awm a, mi tu pawhin Mamata Banerjee-i lu chu min laksak thei a nih chuan lawmmanah cheng nuai 11 ka pe dawn a ni” a ti.

Kawngzawhnaah hian “Jai Sri Ram’ slogan aupui a ni a, hei hi eng political party nen mah inzawmna nei a nih loh thu a sawi a, mahse Mamata Banerjee-i chuan Hindu-te chu a bitum bik a ni, tiin a sawi.

Police-te chuan Birbhuma rally neih tum hi phalna an pe duh lo a, mahse hetichung hian kawngzawh luih a nih vangin tiang nen mipui pungkhawmte hi an hnawtdarh niin an sawi. State chhung hmun dangah pawh Ram Navami leh Hunuman Jayanti puala kawngzawh neihnaah buaina a chhuak bawk.

Trinamool Congress (TMC) chuan BJP hruaitu thusawi hi na takin an sawisel a, State Education Minister Partha Chatterjee chuan sorkar laipui chu Varshney chungah action la tur leh man ngei turin an phut tih an sawi. Chatterjee chuan, “Hetiang zawnga thu sawi hi kan ram political culture kalh tlat a ni. Sorkar laipui chu BJP hruaitu hi man nghal turin ka phut a ni. Trinamool worker mi nuai tel hian Mamata Banerjee tana an nunna hlan hi an inpeih a ni. Tun hmalama politics lama inbeihna rawng tak lo thleng tawh kha thlen nawn tir kan duh lo a ni”, a ti.

TMC MP Sukhendu Sekhar Roy pawhin nimina Rajya Sabha inkhawamah Varshney chungchang hi a sawichhuak a, MP-te chu he thil an dem thu sawichhuak tura a phut thu a sawi a, central-a rorellai party chuan West Bengal-ah sakhua leh thil dang hmangin rawng taka chet a tum a ni, tiin a sawi. Lok Sabha-ah pawh TMC MP Saugata Roy chuan a sawichhuak bawk a, sorkar laipui chu rang taka hma la turin a phut.