Missionary-te visa pawtsei turin ngen

MP pahnih Vincent H Pala leh Conrad K.Sangma-te chuan Prime Minister Narendra Modi leh Home Minister Raj­nath Singh-te hnenah, India rama Kristian missionary-te visa chu pawhseisak turin a ngen.

Union Minority Affairs Minister hlui Pala chuan India rama Kristian-te tihduhdah leh tihhlum an nih ṭhin chungchangah PM chu mimal taka inrawlh tura a duh thu a sawi. Congress MP hian PM chu foreign missionary-te India rama an awm phalsak a, khawtlang rawngbawl hna an thawh te, mi retheite lehkha an zirtir ṭhinte an chhunzawm zel remtih sak turin a ngen.

PM hnena lehkha a thawnah Pala chuan, “Kristiante chu remna leh muanna duhtu, hlim thei tak leh ram tana thawh hlawk tak an nih lai a, an laka huatna leh tharum thawhna thleng fo hi hriatthiam a har ka ti hle a ni”, a ti. Kristiante enhranna a la awm zel tih sawiin, ramdang mi India rama hun rei tak lo khawsa tawh te, zirna leh khawtlang siamṭhatna kawnga thawh hlawk tak tak te, mi rethei leh hnuaihnung zawkte tana thawk ṭhinte chu India ram chhuahsan tura vau an nih fo thu a sawi.

National People’s Party MP awmchhun, Sangma pawhin Home Minister Rajnath Singh-a hnenah missionary-ten visa chungchanga harsatna an tawh ṭhinte chu chinfel sak turin a ngen. Sangma chuan missionary-te hian an visa pawhsei chungcahngah harsatna an tawk fo a, hei hian mi rethei zawkte tana an hnathawhna kawngah pawh harsatna a thlen ṭhin a ni, a ti.

MP pahnihte hian an lehkha thawnah hian ramchhunga missionary hriat hlawh tak tak pali hming an ziak lang bawk a, chungte chu Ignacio Galdos Zuazua (Gujarat), Laurel Judith Seaton (Bihar) leh Jharkhand-a awm ve ve Aurele Andre A. Brys leh Chen Chin Mou hmingte an ziak a ni.

Ramchhung mipui zing­a 2% chu Kristian kan ni.