Mayawati-i’n an party vice president atan a nuṭa ruat

Bahujan Samaj Party (BSP) hotu lu ber Mayawati-i chuan a unaupa, Anand Kumar chu an party vice president atan nimin khan a ruat.

Mayawati-i hian BSP vice president atana a nuṭa a dah dawn hian, MP, MLA leh CM a ni lo ang tih a intiamtir nghal a ni.

Kum 61 mi, Anand Kumar hausakna hi cheng vaibelchhe 1,300 hu vel nia sawi a ni a, Income Tax department pawhin a lo chhui chiang tawh a ni. Kar hmasa khan IT department chuan Delhi leh hmun danga Kumar-a nena inzawmna nei sumdawnna hmun leh firm-te chu an lo dap tawh a ni.

Kumin January khan Kumar-a company-te hian awihawm loh khawpin hlawkna an hmu nia sawi a ni a, kum sarih chhungin 18,000% zetin an hlawk nia sawi a ni a, hemi hun chhung kum nga hi Uttar Pradesh CM-a Mayawati-i a awm lai a ni.

Anand Kumar-a hian a farnu Mayawati-i’n thuneihna a chan hma chuan Noida Authority-ah clerk hna a thawk ṭhin. Kum 2007-a BSP-in sorkarna an chan hnu reiloteah company 50 dawn a nei nghal a ni. Kum 2013 khan Income Tax Department chuan Kumar-a’n Ghaziabad, NH24-a ram a leina tura a aiawh atana a chhawr mi pahnihte kut aṭangin cheng vaibelchhe 400 an man sak a, mahse a hnuah pawisa hi pek kir leh a ni. Kum 2016 December thla khan Enforcement Directorate chuan Delhi-a Karol Bagh-a UBI bank branch-a a account-a cheng vaibelchhe 1.43 dah luh an manchhuak bawk. Hengte hi pawisa note tih thih hnua dah luh an ni.

Mayawati-i chief minister a nih lai khan, a nuṭapa hausakna hi kum nga chhungin cheng vaibelchhe 7.5 aṭangin vaibelchhe 1,315-ah a pung hman a ni.