NDA leh eptu lamin President candidate tur puang

India President thar thlanna neih turah, rorellai BJP kaihhruai National Democratic Alliance (NDA) leh eptu pawl ṭangrualte chuan an candidate tur an puang ta.

President Ram Nath Kovind thlaktu tur hi July 18-ah Parliament leh Legislative Assembly member-ten an thlang dawn a, inthlan result hi July 21-ah puan a ni ang.

NDA candidate Droupadi Murmu
BJP kaihhruai NDA chuan candidate atan tribal hmeichhia, Jharkhand governor hlui, Droupadi Murmu-i an thlang. NDA presidential candidate atana puan anih hnuah, Murmu hi sorkar laipui chuan nimin aṭang Z+ security cover a pe nghal a ni.

Santhal hnam, Droupadi Murmu hi kum 1958, June 20-a piang a ni a, a pasal Shyam Charan Murmu nen fapa pahnih leh fanu pakhat an nei a, a pasal leh a fapate pahnih hi a sun tawh a ni. Politics a luhchilh hma hian Sri Aurobindo Integral Education and Research-ah honorary assistant teacher leh, Odisha irrigation deparmtent-ah junior assistant-te a lo ni tawh.

Kum 2000 khan Odisha minister niin, kum 2015-ah Jharkhand governor-ah dah a ni a, hmeichhia zinga Jharkhand governor ni thei hmasa ber a ni. Kum 2007 khan Odisha Legislative Assembly chuan Nilkanth Award for Best MLA a lo hlan tawh a ni. President-a thlan thlin a nih chuan, India independence hnua piang zinga hmeichhia leh, tribal zinga India President ni thei hmasa ber a ni ang.

Eptu pawl joint candidate Yashwant Sinha
Eptu party-te chuan President thlanna neih turah joint candidate atan union minister Yashwant Sinha an thlang.

National Congress Party (NCP) hotu Sharad Pawar kaihhruaia epty party-ten joint meeting an neihah lungrual takin candidate atan Trinamool Congress hruaitu, Sinha hi an thlang a ni.

Kum 84 mi, IAS officer hlui, Sinha hian a hna bansanin kum 1984 khan Janata Party a zawm a, hemi hnu hian BJP-ah a lut leh a ni. Prime minister hlui Atal Bihari Vajpayee kaihhruai BJP sorkarah kum 1999-2004 chhung khan finance leh foreign minister-te a lo ni tawh. Kum 2014 inthlan neih dawna BJP PM candidate atana Narendra Modi puan a nih khan nasa taka sawiselin, party lakah lungawi loin politics pawh a chawlhsan hial a, mahse kum 2020-a politics lamah kir lehin Trinamool Congress a zawm. TMC hotu Mamata Banerjee chuan party vice president atan a ruat zui a ni.