Mumbai, Chennai, Hyderabad airport-ah venhimna tikhauh

Mumbai, Chennai leh Hyderabad international airport-ah thlawhtheihna hijack tum an awm nia sawi a nih avangin venhimna tihkhauh a ni a, National Security Guard-te duty tir an ni.

Official-te chuan Inrinni khan hmeichhe pakhatin senior police officer hnenah e-mail a thawn a, a e-mail-ah hian restaurant-ah mi paruk titi aṭangin heng airport pathuma thlawhtheihna-te hijack dan chungchang an sawi niin a tarlang.

Mumbai Police-te chuan he thil hi airport vengtu Central Industrial Security Force (CISF) an hriattir nghal a, airport hrang hrangah hian counter-terrorism team dah nghal niin entry gate leh parking lot-ahte vengtu dah belh an ni bawk.

CISF hian khualzinte endik turin uifingte pawh an ko lut nghal a, airlines tinte chu fimkhur tura hriattir nghal an ni. CISF Director General OP Singh chuan Mumbai Police-te e-mail dawn hi dawt pawh a ni mai thei a, mahse ngaihzam mai an tum lo tih sawiin, hei vang hian a theih angin security lam tihkhauh a nih thu a sawi a, e-mail chungchang pawh hi chhui chian mek a ni tih a sawi.

Indian airlines-te’n hijack an tawh hnuhnun ber chu kum 1999, December thla kha a ni. Pakistan-a hmunpui nei, Harkat-ul-Mujahideen chuan Delhi pan tur, Indian Airlines flight IC-184 chu Kathmandu aṭanga hruaikawiin, Pakitan rama Kandahar-ah an ṭumtir a ni. Hetih hunlaia thuneihna changtu, Prime Minister Atal Bihari Vajpayee-a kaihhruai sorkar chuan thlawhtheihnaa chuang hrenbehte chhuah an nih theih nan hian firfiak pathum a chhuah phah a, an zingah hian Masood Azhar pawh a tel a ni.