Maha-a rorellai Shiv Sena MLA helte Guwahati-ah inkulh

Maharashtra-a rorellai, Shiv Sena party MLA ṭhenkhat chu National Congress Party leh Congress nena ṭangrual sorkar, Maha Vikas Aghadi (MVA) sorkar an siamah lungawi loin an hel.

Shiv Sena hruaitu Eknath Shinde kaihhruai MLA helte hi Assam khawpui, Guwahati-a hotel-ah an inkulh mek a, MLA lungawi lo hi 40 an tling tawh niin Shinde chuan nimin khan a sawi. MLA-te inkulhna hotel hi police ṭhahnem takin an veng zui bawk.

MLA helte hian Shiv Sena hotute lakah an lungawi lo ni loin, NCP leh Congress party thawhpui chu an thei tawh lo niin an sawi. Maharashtra chief minister, Shiv Sena hotu Uddhav Thackeray pawh CM a nihna aṭanga bang tura an phut kher loh thu leh, BJP thawhpuia sorkar thar siam zawk tura an duh thu an sawi a ni.

Shiv Sena hi pro-Hindutva an nih laiin, Congress leh NCP hian secular sorkar an thlawp a, hei vang hian a tir aṭangin an thawhhona hi a nghet ṭha lo nia ngaih a ni. He buaina thlengah hian BJP lam inrawlha an puhna pawh a lian hle a, mahse BJP lam hi an la ṭawngchhuak duh lo.

Hetih lai hian MLA hel hotu ber, urban development minister Eknath Shinde hi sorkar siam tirah pawh CM Uddhav Thackeray anga Z-plus security pek a phut laia Z category security pek anih avangin a lawm lo hle. Hei bakah hian CM fapa, environment minister Aaditya Thackeray kaihhruai, youth wing Yuva Sena te rawn lian chho zel chuan a ngaimawh a, hei hi a hel chhan pakhat nia sawi a ni bawk.

Eknath Shinde hian a lamṭang, MLA helte hi a tirah Surat, Gujarat-ah a hruai chhuak hlawm a, mahse heta ṭang hian Guwahati lamah an insawn leh a ni. Assam hi Shiv Sena lamin hnuhma an neih lohna, BJP thuneihna hnuaia awm a nih avanga pan nia rin a ni bawk. Guwahati an thlen pawhin Shinde hi Assam chief minister Himanta Biswa Sarma ṭhianṭha tak, BJP MLA Sushanta Borgohain chuan a lo dawngsawng a ni. Shinde chuan MVA ṭangrual sorkar chu an thawhpui party dang pahnihte chauhin an chhawr nia sawiin, an party chakna pawh an lem zawh sak dawn niin a sawi. Hei vang hian Shiv Sena party din khawchhuak leh an chak chhohna turin, NCP leh Congress party an thawhpuina chu a tihtawp a ngai a, Maharashtra state tana ṭhatna turin thutlukna an siam tih a sawi.

Thackeray-a'n CM chenna in chhuahsan
Chief minister Uddhav Thackeray chuan MLA helte chuan hmaichhanah CM-atan an duh tawh loh thu leh, bang tura an phut thu an hrilh a nih chuan a bang nghal ang tih a sawi. Nilaini zan khan CM official residence pawh chhuahsain, Matoshree-a an chhungkaw inah a insawn a, CM erawh a la ni chhunzawm ang.

CM official residence a chhuahsan dawna thu a sawiah Thackeray chuan, "Ka mi leh state ngeiin thuneihna chelh chhunzawm tura min duh tawh lo a nih chuan engatinge hmun danga kal bo kher loin ka hnenah min hrilh mai loh? MLA pakhat lek pawhin chu thu min hrilh ni se CM post aṭang hian ka bang em em ang," a ti. MLA helte chuan an state-a kir a, an duh leh phutte chu hmaichhanah sawipui turin a sawm nghal bawk a ni.