Delhi Police-te chuan Tamil Nadu-a rorellai, AIADMK (Amma) deputy general secretary TTV Dinakaran-a chu an pawl tana an party symbol, hnah lem pahnih hman a nih theih nana thamna peah puhin a lakah FIR an ziak lut. 
AIADMK hotu, J Jayalalithaa-i a thih hnuah an party chhungah buaina a awm a, Chief Minister hlui Jaya-i thlaktu tura an thlan, VK Sasikala-i leh O Panneerselvam te chuan lamṭang hran ve ve an nei a ni. Pawl pahnihte hian Jaya-i bial thihsan taka by-election neih turah candidate hran ve ve siamin, party symbol changtu zawk nih an inchuh a, mahse election commission chuan AIADMK symbol hi an hman remti loin, symbol hran hmang rih turin alo hriattir tawh a, party symbol hmang chhunzawm thei tur zawk hi a la rel dawn a ni. 
Hetih hian hian Sasikala-i lam, AIADMK (Amma) hruaitu Dinakaran-a hian party symbol hi an hman theihna tur­in election commission official-te tham tumin palai a chhawr a, a palai chhawr pawh hi thamna tam tham tak peah puh a ni. Dinarakan-a’n palai atana a chhawr Sukesh Chander chu five-star hotelaṭangin man a ni a, a kut aṭangin pawisa fai cheng vaibelchhe 1.3 man a nih bakah, luxury car pahnih pawh an man tel niin police-te chuan an sawi. 

Deputy commissioner of police (crime) Madhur Verma chuan Dinakaran hian an party symbol an chan theih nan hian official-te hnenan thamna cheng vaibelchhe 50 a pe tih thu an dawng niin a sawi a, hemi atan hian palai hna thawk turin Chander hi a chhawr a ni, a ti. 
RK Nagar assembly by-election neih tur hi vote leina atana sum leh thildang tam tak sem a ni tih hriatchhuah a nih vangin election commission chuan in­thlan neih tur hi a ṭhulh a, hun remchang dangah buatsaih a nih zawk tur thu alo sawi tawh a ni. 
Dinkaran-a hi VK Sasikala-i vahna niin, eiruk thubuai a neih mek bakah, AIADMK-a Sasikala-i pawl lamah hruai­tu niin, RK Nagar by-election neih tura an candidate a ni.