Indian Army lakah FIR thehlut
Jammu & Kashmir-a Kashmir Valley-ah sipaiten nawrh huaihawtte laka invenna atana sipai motor-ah mi pakhat an phuarbeh avangin Indian army lakah FIR ziahluh a ni.
Kar hmasa-a Kashmir-a by-election neih laiin sipai motor-ah mi pakhat chu phuar beh niin, motor hian tlan kualpui a ni a, he video hi internet lamah thehdarh niin mi tam takin sipaite thiltih hi an sawisel a ni. Chief Minister Mehbooba Mufti pawhin state police-te hnenah he thil thleng chungchangah hian report kimchang pe turin a hriattir bawk.
Jammu and Kashmir Police-te chuan nimin khan Army lakah hian FIR hi an ziaklut a ni. Army pawhin he thil thleng hi a hrana an chhui chian tur thu an sawi bawk.
Police-te chuan Indian Army lakah hian inrukbo leh midang nunna derthawnga puhna thubuai pawh siamsak a ni mai thei tih an sawi.
Sipai motor-a an phuarbeh hi Central Kashmir-a Budgam district ami, Sihaharaan khuaa cheng Farooq Ahmad Dar a ni a, a phuartute hi 53 Rashtriya Rifles an ni. Thu an zawhfiahnaah, Dar chuan vote a thlak zo, a farnu in-a kal a tum laiin kawng lakah sipaite hian lo manin motor-ah hian an phuar ta niin a sawi.