Maharashtra politics : Eknath Shinde lamṭang MLA an pun belh zel

Maharashtra politics buaina chuan zual lam a la pan zel a, Shiv Sena MLA Eknath Shinde kaihhruaia ṭangrual sorkar laka hel MLA, Guwahati-a inkulhte chu thlawptu an awm belh zel.

Shinde chuan nimin khan an lam ṭang MLA hi Maharashtra aṭanga thlen belh lehin, MLA 50 an tling tawh dawn niin a sawi. Heng zinga 40 chu Shiv Sena MLA niin, independent MLA 10 an awm bawk tih a sawi.

June 20 aṭang khan Shinde hoin Maharastra chief minister Uddhav Thackeray kaihhruai ṭangrual sorkar laka hel MLA-te hi Assam khawpui, Guwahati-a hotel pakhatah an inkulh a ni. Heng MLA rualte hian June 23 khan Shinde chu an awm zel dan tura thutlukna siam turin mawhphurhna an pe.

Shiv Sena hruaitu Sanjay Raut chuan MLA helte hi Mumbai-a kir a, an lungawi lohnate chu hmaichhanah CM Thackeray sawipui turin a ti. Shiv Sena Party MLA zawng zawngin National Congress Party (NCP) leh Congress nena Maha Vikas Aghadi (MVA) ṭangrual sorkar an siam aṭanga inhnuhdawh an duh a nih chuan, an party chuan ngaihtuah a inpeih reng tih a sawi a, mahse an duhdante chu CM hi an sawipui ve a ngai a ni, a ti.