AIADMK pawl pahnihten inchhunfin dan ngaihtuah

Tamil Nadu-a rorellai, AIADMK-a pawl pahnih awm chuan inchhunfin dan an ngaihtuah mek nia sawi a ni.

VK Sasikala-i lamṭang, AIADMK (Amma)-a an hotu, Chief Minister E Palaniswami chuan CM hlui, O Panneerselvam-a lamṭangte nena inchhunfin dan ngaihtuaha inbiakna nei turin member 10 awmna committee a din.

Minister tam zawk chuan an party hotu lu ber, VK Sasikala-i leh a vahpa, TTV Dinakaran-te chu party hruaitu an nihna aṭanga bang turin an duh tawh nia sawi a ni. Sasikala-i hi a sum lakluh phu loa hausaa puhna thubuaiah thiam loh chantir a nih avangin Bengaluru jail-ah a tang mek a ni.

Party hnuaia pawl pahnihten inchhunfin tura inbiakna an neih turah hian AIADMK hotu lu ber atan Sasikala-i aiah Panneerselvam dah an rel dawn nia sawi a ni. Jayalalithaa-i a thih hnu khan hun rei tak a hnung lo zuitu, Sasikala-i hi a mah thlaktu atan thlan a ni. Mahse Jaya-i’n chief minister atana alo ruat, Panneerselvam chu Sasikala-i lakah hian a hel a, AIADMK hnuaiah pawl pahnih a awm phah ta a ni.

Panneerselvam-a thlawptu lam chuan party hotu bakah, chief minister-ah dah chhunzawm an duh a, mahse pawl pahnihte hi an inchhunfin chuan Panneerselvam hi party hotu lu berah dah niin, chief minister ṭanglai Palaniswami chu a hna chelh chhunzawm tir tum a ni.

Supreme Court-in February thlaa Sasikala-i a thubuaiah thiam loh a chantir avang khan, jail aṭanga an party leh sorkar a thunun chhunzawm zel theih nan tan-ina dah a nih hma lawkin a vahpa, Dinakaran-a hi party deputy chief atan a dah a ni. Mahse Dinakaran-a hi eirukna thubuai hrang hrang siamsak a nih hnuah, minister leh AIADMK MLA tam zawk chuan an party hming a tichhia nia ngaiin, a lakah an hel tawh a ni. Minister zawng zawng chuan Sasikala leh Dinakaran-te hi bang turin an duh tawh a, MLA zingah bang tura duhtu hi eng zat chiah nge awm hriatchian a la ni lo.

Party chhunga pawl pahnih a awm avang hian Election Commission chuan RK Nagar by-electoin neih turah pawh AIADMK symbol, hnah pahnih lem chu an hman a remti lo a, symbol hran ve ve hmang turin a ti a ni. Party symbol hmang chhunzawm thei zawk tur chu EC hian a la rel dawn a ni. Mahse RK Nagar by-election neih tura hian voter-te vote lei nan sum leh thil dang tam tak sem a ni tih a hriatchhuah avangin inthlan neih tur hi a ṭhulh a, hun remchang dangah buatsaih a ni zawk dawn tih a sawi.

Dinakaran-a hi an pawl lamin party symbol an chan theih nan Election Commission official-te tham tuma puhin, palai atan midang a chhawr a, a mi chhawr pawh hi five-star hotel aṭangin Delhi police-te’n an man a, Dinakaran-an official-te tham tura a chah dan pawh a inpuang tawh bawk. Delhi Police-te chuan Dinakaran hi eirukna leh midang phiarruknaa inhnamhnawihah puhin thubuai an siamsak tawh bawk a ni.