Kashmir-a sipaite plastic bullet hmang turin ngen

Sorkar laipui chuan Jammu and Kashmir-a security force duty-te chu, nawrh huaihawta pungkhawm leh lung hmanga sipai duty tawng ṭhinte hnawhdarhna atana pellet (musep) an hman ṭhin chu titawp a, a aiah plastic silai mu hmang tawh zawk turin a ngen.

Plastic bullet hi a chhung kawrawnga siam niin, hliam na lutuk a thlen lo nia sawi a ni. Plastic silai mu hi kum 2010-a Kashmir Valley-a tharum thawhna nasa tak a thlen khan hman ṭan a ni a, hemi hun lai vek hian musep, pellet gun pawh hi hman ṭan a ni bawk.

Security force-te’n firfiak Buhran Wani an kahhlum avanga Kashmir Valley-a buaina nasa tak a chhuah leh hnu khan sipaite hian mipui pungkhawmte hnawh darh nan pellet gun hi an hmang uar chho leh a, mahse hei hian hliam na tak bakah, mita kah fuhte chu mitdelna hial a thlen avangin sawisel a tawk nasa hle a ni. Hemi hnu hian committee chuan PAVA shell emaw, chilly bomb emaw hman mai a rawt a, mahse sipaite chuan hengte hi mipui hnawhdarh leh thunun nan an hman tlak loh niin an ngai.