India ramah hri kai hmuh chhuah thar 16,922 an awm

Covid-19 hri lengin India ramah ziaawm lam a pan thei lo a, nimin khan hri kai hmuh chhuah thar mi 16,922 an awm.

India ramah hian hri len ṭantirh aṭanga nimin thleng khan hri kai mi 4,73,105 an awm tawh a, heng zinga 2,71,697 hi enkawl dam leh tawhin 1,86,514 chuan an kai mek a, mi 14,894-in an thihpui tawh bawk.

Nimina Ministry of Health and Family Welfare report tihchhuahah chuan darkar 24 chhungin hri kai 13,012 lai enkawl dam an nih thu tarlan a nih laiin thihpui 418 lai an awm thung.

Enkawl dam tawh rate hi 57.43% a ni tawh a, enkawl dam lamah hian India hian hma a sawn hle a ni. 

MoHFW chuan ram puma Covid-19 case awm zinga 69% chu Maharashtra, Delhi, Tamil Nadu, Gujarat leh Uttar Pradesh aṭangin a nih thu an tarlang a, recovery rate-ah chuan Meghalaya, Rajasthan, Chandigarh, Andaman & Nicobar Islands leh Madhya Pradesh-te chu an sang hle a, heng state leh UT-ahte hian recovery rate 76% a tling a ni. India ramah hian state leh UT 21 laia recovery rate chu national average aiin a sang.

Indian Council of Medical Research (ICMR) chuan ni khatah Covid-19 sample 2,07,871 an test thei tawh a, hri len ṭantirh aṭanga nimin thleng khan sample 75,60,782 an test tawh a ni. 

Laboratory pawmpui 1007 nei tawhin heng zinga 734 hi sorkar laboratory a ni a, 273 chu private laboratory a ni thung. 

Hri kai  hmuh chhuah pung zel mah se a tam zawk chu an ngaihtuahawm lo a, tam tak chu taksaa natna langchhuak lo, asymptomatic an ni. Hri kai enkawl mek zingah 4.16% chauhin ventilator an mamawh niin sorkar official chuan a tarlang.

Hri kai, damdawiina enkawl mek zinga 15.34% chu ICU-ah dah ngai niin, oxygen nena puih ngai chu 15.89% an ni bawk.  

Official chuan India chu hri vanga thi, death rate hniamna ber ram zingah a tel tih a sawi. June 22-a WHO-in report a tihchhuahah, India rama hri vanga thi chu mi nuai khatah 1.00 a nih laiin, khawvel pum huapa hri vanga thi chu mi nuai khatah 6.04 a tling a ni, a ti.