Sorkar laipuiin Shiv Sena MLA helte Y+ security a pe

Maharashtra-a ṭangrual sorkar zinga mi, Shiv Sena party MLA hel zinga 15-te chu BJP kaihhruai sorkar laipui chuan Y+ category security a pe.

Eknath Shinde kaihhruai Shiv Sena MLA helte hi BJP sorkarna, Assam-ah kalin, Guwahati-a five star Radisson Blu Hotel-ah kar liamta Nilaini aṭang khan an inkulh tawh a ni. Heng MLA-te tan hian hotel room 70 chu ni sarih chhung atan book a ni a, a senso hi cheng nuai 56 vel a tling dawn nia sawi a ni. Hei bakah hian an ei leh in bakah service dangte tan ni khatah Rs nuai riat vel zel an chawi belh rin a ni bawk.

Shinde hian Maharashtra-a Shiv Sen, National Congress Party leh Congress party-te ṭangrual sorkar siam, Maha Vikas Aghadi (MVA) sorkar chuan MLA hel chhungte hnena security pek chu an titawp niin a sawi , hemi hnu hian sorkar laipui chuan Y+ security hi a pe zui nghal a ni.

Nimin khan MLA helte hian an awmna hotel-ah Shinde hoin an kal zel dan tur an ngaihtuah. Shinde hian Shiv Sena MLA 55 zinga 38-in an thlawp niin a sawi. Shinde lamṭangte hian Shiv Sena chu MVA ṭangrual sorkar aṭanga inhnukdawk a, BJP nena thawkduna sorkar thar siam an duh a ni. Hetih lai hian Mumbai lama an party hotute chuan an party MLA helte an state-ah kir leh phawt tura tiin, chief minister Uddhav Thackeray hnenah an thil phutte chu hmaichhana an sawipui hunah an ngaihtuah dawn tih an sawi.