Sorkarin May 1 aṭangin VIP light chhit khap dawn

Sorkar laipui chuan VIP culture tihtawp tumin, May 1 aṭangin VIP light, a sen leh pawl chhit a khap dawn. He khapna hian President, Prime Minister, minister leh judge-te pawh a huam vek dawn a ni.

May 1 aṭanga hman ṭan tur he khapna hian emergency motor, ambulance-te erawh a huam tel dawn lo. Heng motor-te hian emergency thil bikah VIP light hi an chhi thei dawn a ni.

Uttar Pradesh leh Punjab sorkarte chuan an state chhungah VIP light chhit hi an lo khap tawh bawk a ni.

Tunhnaia meeting neih ṭhinah Prime Minister Narendra Modi chuan VIP light chhitin mipuite tana harsatna a thlen ṭhin chungchang a ngaihmawh thu leh, tihtawp a duh thute a lo sawi tawh ṭhin nia sawi a ni. Tun hnaia Bangladesh Prime MInister Sheik Hasina a rawn zin ṭum pawh khan, PM Modi-a convoy chuan traffic tibuai loin Delhi Airport-ah hian a lo hmuak a ni.