Babri Demolition Case : SC-in thubuai tinung leh turin hriattir

Supreme Court chuan Babri Masjid tihchhiat chungchanga BJP hruaitu hlun Lal Karishna Advani, Marali Manohar Joshi leh midangte thubuai chu tinung leh turin nimin khan thupek a tichhuak.

Allahahad High Court-in BJP hruaitute laka thubuai siam tihtawp tura a lo rel tawh chu hnawlsakin, Justice Pinaki Chandra Ghose leh Justice Rohinton Fali Nariman awmna bench chuan Central Bureau of Investigation (CBI) chu hemi chungchang chhui chhunzawm tur hian a ti a ni.

Court chuan sessions judge-te’n a lungawi thlak tawk nia an ngaih hma chuan thubuai hi titawp sak ngawt tur a ni lo tiin, CBI pawh thuhretute chu an statement lak hun tura an inlan vek thei vek tura lo buaipui turin a ti. He thubuai chungchanga thuchhuah a siam ni, nimin April 19 aṭanga kar li chhung ngeiin trial court chuan a ngaihtuah tur a ni tih a sawi bawk.

Kum 1992 khan muslim mosque hi ring-wing volunteer hoin an tichhia a, hetiang thil titur hian LK Advani, Umar Bharti leh Murli Manohar Joshi-te chuan an fuih phur nia sawi a ni. CBI chuan mosque tihchhiat a nih ni hian a bul hnaiah BJP hruaitute chuan inhuatna lam chawk tho thei zawngin thu an zawi ngei tih finfiahna pawh an nei niin a sawi.

Allahabad High Court chuan kum 2010 khan CBI-in BJP hruaitute laka criminal charge a siam chu a pawmpui lo tih a sawi a, mahse he hi CBI chuan Supreme Court-ah an appeal a ni.

Babri Masjid tihchhiat a nih avanga Hindu leh Muslim inkara buaina chhuakah hian mi 2,000 chuang an thi a ni.