Vijya Mallya-a bail-in chhuahtir

Leiba tam tak a neih avanga London lama tlanchhe mek, sumdawng lian Vijay Mallya-a chu Thawhlehni khan UK Police-te’n an man a, Westminster Magistrate Court-ah hruai a nih hnuin, hemi ni vek hian bail-a chhuah tir leh nghal a ni.

Vijya Mallya hian bank hrang hrangah loan a lakna leiba tam tham tak a nei mek a, hei vang hian a chungthu ngaihtuah a nih theih nan thuneitute chuan India rama thawn turin UK sorkar a ngen a ni.

Mallya hian a airlines tihtawp tak, Kingfisher Airlines hminga bank hrang hrangah loan a lakna cheng vaibelchhe 9,000 chuang a ba mek a, kum 2016 March thlaa Supreme Court-a bank intelkhawmte an zualko khan India ram aṭangin a tlanchhe zui a ni. Court-a inlan turin ṭum eng emaw zat koh ni mah se, tun thlengin India ramah a rawn kir duh lo a ni.

Kumin January khan CBI court chuan Mallya hian IDBI bank loan cheng vaibelchhe 720 a pek loh avangin a lakah non-bailable warrant a lo tichhuak tawh bawk.