Congress party-in VIP light tihtawp tur thlawp
Sorkar laipuiin May 1 aṭanga VIP light, a sen leh a pawl chhit ṭhin tihtawp a nih tur thu a puan chu eptu party, Congress chuan an thlawp thu an sawi. Hemi rual hian BJP chuan Congress policy a rawn chhunzawm chho ve mek niin an sawi bawk.
Congress party thupuangtu Manish Tewari chuan, “Supreme Court chuan kum 2013, December 10 khan VIP light sen chhi thei chin a lo thliar tawh a ni. Kum thum leh a chanve hnuah BJP chuan hei hi politics hmanruaah rawn hmangin, hmingṭhatna lak a tum a, hei hi thil nuihzatthlak tak a ni” a ti.
Congress chief spokesperson Randeep Surjewala chuan VIP culture tihtawp tumna chu lawmawm a tih thu sawiin, he thil hi Congress party chuan Punjab state-ah an bul an lo ṭan tawh niin a sawi.
Sorkar laipui chuan VIP culture tihtawpna kawng khata atan May 1 aṭangin VIP light chhit a khap dawn a, he khapna hian President leh Prime Minister pawh a huam dawn a ni. May thla aṭang chuan VIP light hi emergency vehicle - ambulance leh kangṭhelh motor te chauhin an chhi thei tawh dawn a ni.
Punjab leh Uttar Pradesh chuan VIP light hi an lo titawp tawh a, Nilaini-a sorkar laipuiin thuchhuah a siam hnuah, nimin aṭang khan Maharashtra Chief Minister Devendra Fadnavis leh Goa Cheif Minister Manohar Parrikar-te chuan an official car-a VIP light awmte an la thla nghal bawk.
Maharashtra CM chuan a twitter-ah PM Modi-a kaihhruai sorkar hmalakna chu a thlawp thu sawiin, democracy tihchakna atan a car-a red beacon light pawh a lakthlak nghal thu a sawi a, cabinet minister-te pawh an official car aṭanga VIP light la thla nghal vek turin a tibawk a ni.
Goa CM Parrikar pawhin VIP culture tihtawp chu ṭha a tih thu sawiin, President leh Prime Minister tih loh tan chuan red beacon light chhit ṭulna hi a awm lo a ni, a ti.