J&K-ah SSB office leh dawr 45 kang ral

Jammu and Kashmir-a Doda district-ah Nilaini zan khan kangmei nasa tak a chhuak a, Sashastra Seema Bal (SSB) camp office leh dawr 45 a kangral.

Kangmei chhuah hun hi zanlai dar 12 vel a ni a, Bhalesa biala Bhatyas bazar hmunpuiah kangmei hi a chhuak a ni. Kangmei chhuak vang hian thi leh hliam an awm lo a, mahse bungrua vaibelchhe tel man a kangchhia a ni.

Police leh tualchhung mite chuan kangmei chhuak hi theih tawpin an ṭhelh a, kangṭhelh pawl pawh hriattir nghal an ni. Mahse kangṭhelhtute hi Thatri leh Gandoh-ah an awm a, an station aṭangin Bhatyas market hi km 16 vel ve vea hlaa awm a ni.

Sub- Divisional Police Officer Gandoh Sunny Gupta chuan zing dar 5.30 velah kangmei chhuak hi an ṭhelh mit thei chauh niin a sawi a, dawr 45 zet a kangchhe hman a ni.

Tun ṭum hi kumin chhunga Doda district-a kangmei a chhuah ṭum thumna a ni a, April 15 khan Gandoh market-ah kangmei chhuakin dawr 26 leh chenna-in pariat a kangral vek a, February 10 khan Gandoh-ah bawk kangmei chhuakin dawr pali leh chenna in pahnih a kang ral bawk a ni